Ocio, cultura e actividades

Centro de interpretación Avifauna

O centro encóntrase situado no lugar de Bravos, pertencente á parroquia de Vicinte. A visita a este centro permite ao visitante un percorrido a través do cal poderá facerse unha idea da riqueza avícola dos cinco continentes, facéndose especial fincapé na fauna autóctona galega. No centro exhíbense aproximadamente 200 especies de aves.

Marcelle naturaleza

Situado en San Martín de Guillar, Outeiro de Rei, trátase dun amplo espazo natural dedicado aos animais, onde poderemos relaxarnos e pasear observando unha gran variedade de especies en réxime de semiliberdade.

Cebras, bisontes, llamas, canguros, renos e moitos máis animais nun entorno de gran beleza e encanto.

Casa-Museo Manuel María

CASA-MUSEO MANUEL MARIA

Situada en Outeiro de Rei, ao carón da Casa Consistorial, a Casa-Museo Manuel María acolle e expón ao público visitante todo o legado persoal, artístico e bibliográfico da que quizá sexa a voz literaria máis prolífica e dinámica da segunda metade do século XX: a súa biblioteca persoal -composta de máis de 12.000 volumes que a converten nunha das mellores coleccións particulares do libro galego e sobre Galiza -, a famosa colección de navallas do poeta, unha colección de pinturas con obras dalgúns dos máis importantes pintores galegos contemporáneos (Castelao, Maside, Laxeiro, Abelenda, Sucasas, Lugrís, Seoane, Leandro, Blas Lourés…), etc.

Museo da Olería de Bonxe

Situado na parroquia de Bonxe, reúne unha importante mostra de pezas de olaría tradicional destinadas outrora ao uso doméstico (olas, cazolas, chocolateiras, nateiras, botixos, unha curiosa tapa da bola…). Estas pezas foron realizadas polas expertas mans de oleiros da zona como Xosé do Xastre ou o propio Indalecio Lombao, a cuxa figura e persoa está dedicado este museo.

Vida de Aldea

Na parroquia de San Clodio, Vida de Aldea permite gozar da paisaxe, dos camiños, das fontes, das árbores centenarias, das rochas… O visitante poderá, previa cita, gozar da natureza deste singular recuncho ademais de visitar a explotación gandeira familiar ou as hortas ecolóxicas, que en réxime de aluguer, amosan que con pequenos esforzos os resultados poden ser sorprendentes.