Declarados BIC de Galicia (DOG nº 147, do 03/08/2017). Localizados nun afloramento granítico de considerables dimensións, situado a máis de 500 metros de altitude, moi afectado pola acción erosiva e os incendios forestais. No seu extremo oeste hai unha combinación circular formada por 3 círculos concéntricos e 1 cazoleta central; o diámetro é de 15 cm, os relevos aparecen moi desgastados, apenas perceptibles por causa da acción erosiva. Na parte central do afloramento hai un grupo de 15 cazoletas ou coviñas de tamaño variable, entre 3 e 10 cm de diámetro. Tamén aparecen varias incisións con forma de ferradura. A tradición popular di destas últimas que son as pegadas que deixou o cabalo de Santiago, cando o Apóstolo pasou por estas terras. As coviñas e os círculos concéntricos poderían datarse na Idade do Bronce e as ferraduras quizais en época medieval.