NON Á VIOLENCIA DE XÉNERO

Este venres, día 25 de novembro, conmemórase o Día Internacional de Eliminación da Violencia contra a Muller e un ano máis,  dende o Concello de Outeiro de Rei, queremos manifestar o noso firme rexeitamento contra calquera forma de violencia contra as mulleres.

Por estas datas temos sempre un especial recordo para as mulleres que perderon a vida vítimas da violencia, sen esquecer ás súas familias e amizades.

A Delegación do Goberno contra a Violencia de Xénero contabiliza a data 10/11/2022, 38 mortes de mulleres; nesta cifra non se contabilizan os casos que están sendo investigados, co que o número real podería ser maior.

Tampouco debe esquecerse que a violencia de xénero ten outras vítimas: os/as menores de idade. No que vai de ano hai 2 menores mortos por esta violencia. Ademais, ata o momento, quedaron orfos 26 menores de idade por causa desta violencia.

Segundo o Portelo Estatístico da Delegación do Goberno contra a Violencia de Xénero, con data 31 de outubro xa se levan rexistradas 78 146 chamadas “pertinentes” ao teléfono 016, das cales, 3 423 realizáronse desde Galicia. O número de denuncias por violencia de xénero elevouse na mesma data ata as 87 508, 3 508  delas en Galicia. Son datos alarmantes que non deixan de medrar.

Continúan a ser datos tremendos e segue sendo preciso tomar conciencia da lacra que supón a violencia de xénero e reflexionar; como sociedade debemos implicarnos e rexeitar calquera tipo de comportamento violento.

En moitas ocasións,  aínda que hai maltrato non hai denuncias e outras moitas, a muller denuncia pero despois retira a acusación ou non vai a declarar.  Lembrar que todas as persoas que formamos parte desta sociedade temos a obriga de denunciar, facendo visible calquera situación de risco ou de violencia que coñezamos.

TELÉFONOS DE INTERESE EN MATERIA DE VIOLENCIA DE XÉNERO