ESTE SÁBADO VISITEN A NOSA FEIRA E ATOPARÁN…

A XV FEIRA DA ARTESANÍA  DE OUTEIRO DE REI que se celebra este sábado dia 1 de xullo, ofrecerá moitas opcións para gozar dese día, enumeramos algunha desas múltiples posibilidades:

EXPOSITORES

Para este sábado hai confirmados 91 postos repartidos nas seccións de  artesanía,  alimentación e outros postos e entidades.

A sección de artesanía  oferta gran variedade de produtos (de cerámica, cestería, artesanía en madeira, traxe rexional, gancho e calceta, xoiaría, coiro, instrumentos de música tradicional, xoguetes,  ferro, artesanía téxtil, decoración,  cantaría, macramé, bolillos, manualidades, xabóns e cosmética natural, bixutaría,   costura creativa, etc… ). Tamén poderase mercar algunha que outra antigüidade testemuño do bo facer dos nosos antepasados.

Dentro desta sección están programadas ao longo da xornada varias demostracións en vivo de oficios:

    • De olaría, realizadas por representantes de dúas importantes olarías de tradición de Galicia: Buño e  Gundivós, situáranse na rúa Manuel María, no cruce coa rúa D.
    • Do oficio de ferreiro a cargo do ferreiro de Xeré, situarase na rúa Manuel María no cruce coa rúa Z.
    • A asociación Bolboretas fiandeiras realizará fiado  de la  e  membros da asociación Corazóns artesáns exhibición de macramé e bolillos e seguro que algunha sorpresa máis (na rúa D).
    • Varios expositores máis farán demostración nos seus postos do traballo que realizan diariamente.

Por outro lado, na sección de alimentación, na que hai admitidos 21 postos, atoparemos produtos de panadería, embutidos de León, distintas variedades de queixos, chocolates, mel, licores, vinagre de allo negro,  fariña de castaña e castañas secas, marmeladas, doces, cereixas do Jerte, xeados etc.. A alimentación animal tamén terá un oco na feira coa presentación por parte da empresa CampoLab do seu produto fariña de castaña.

Fóra destas seccións, a feira, cuxos postos estarán abertos ata as 21:00 h, acollerá tamén, OUTROS POSTOS E ENTIDADES, entre os que poderemos atopar:

  • RESIDENCIA CANINA GARATUXA, residencia asentada na parroquia de Matela en Outeiro de Rei, situarase  a partir das 13:00 h á entrada do Campo de Santa Isabel cun punto de adopción canina. O Concello de Outeiro de Rei mantén con esta empresa un convenio para a recollida e atención de cans abandonados. Durante toda a xornada as persoas que desexen ter un can terán durante a feira unha boa oportunidade pois as adopcións que se realicen ese día recibirán algún agasallo destinado á alimentación e coidado do can adoptado e poderán non ter ningún custe para a persoa que adopte se o can  é un dos que o Concello de Outeiro de Rei teña nese momento en acollemento e a persoa interesada solicita a axuda de 100 € que ten aberta o Concello para fomentar a adopción de cans abandonados.Neste punto tamén haberá xogos e pintafacianas para nen@s.
  • Punto solidario de recadación de fondos para mercar un can de asistencia para RODRI, un neno de Outeiro de Rei con autismo. A recadación obtida durante a xornada froito da venda de diferente merchandaising será ingresada na conta aberta para este neno pola entidade sen ánimo de lucro DOG POINT, especializada en adestramento, acollemento e seguimento de cans de servizo para nenos e nenas con TEA.
  • ANDAINA SOLIDARIA. A Asociación SOMOS UNIDOS POR EL CÁNCER en colaboración co Concello de Outeiro de Rei organiza a II ANDAINA SOLIDARIA DO CONCELLO DE OUTEIRO DE REI que sairá da Praza do Concello ás 10:30 h e cuxa recadación ira destinada integramente aos fins sociais da entidade.
     
    De fácil percorrido, é unha actividade perfecta para empezar o día en Outeiro de Rei, gozando en familia, con amigos ou incluso facéndoos durante o percorrido de 6 km, nun  entorno moi agradable; as persoas interesadas en participar poderán realizar as súas inscricións realizando o pago da cota a través da plataforma Bizum, o  custe é de 3 € e haberá que deixar constancia do ingreso no tfno. 636 511 928 achegando nome e apelidos, xustificante do ingreso xunto ao concepto: CARREIRA OUTEIRO. Tamén pódese realizar a inscrición media hora  da saída, na Praza do Concello de Outeiro de Rei.

EXHIBICIÓNS

No Campo de Santa Isabel terán lugar:

  • A partir das 13:00 h, nas inmediacións do circuíto deportivo, DEMOSTRACIÓN DE TRABALLOS FORESTAIS CON MOTOSERRA  actividade que seguro sorprenderá ao público coa realización de diferentes pezas utilizando esta ferramenta, figuras que serán repartidas gratuitamente na súa maior parte entre o público infantil; poderase ver a transformación dun  gran tronco de madeira  en táboas  e en diferentes momentos faranse podas en altura e  haberá charlas explicativas sobre a seguridade nos traballos forestais
  • A partir das 13:00 h, CONCENTRACIÓN DE VEHÍCULOS CLÁSICOS na que se darán cita diferentes marcas de coches clásicos e motos.
  • Ás 17:00 h, neste caso na rúa Avda. Terra Chá, EXHIBICIÓN DE MINIMOTOS da Escola de Motocicilismo de Outeiro de Rei que terá unha carpa informativa no Campo de Santa Isabel durante toda a xornada.
  • Nas inmediacións da capela de Santa Isabel, ás 18:00 h terá lugar unha EXHIBICIÓN E ACTIVIDADE PARTICIPATIVA DE TIRO CON ARCO, a cargo da Escola Lucense de Tiro con Arco representada por Alfonso Fernández, adestrador nacional e  presidente da entidade.

ACTIVIDADES E ESPECTÁCULOS

  • Exposición TRAXE ALDEÁN DE GARDA NAS TERRAS LUGO, fermosos traxes realizados polo obradoiro artesán lucense Traxandaina; a exposición, organizada polo Concello de Outeiro de Rei, poderase visitar ao longo da xornada e ata o día 3 no Hotel Casas da Fortaleza, instalación turística de recente apertura na vila de Outeiro de Rei que cedeu gratuitamente ao Concello o espazo para esta interesante mostra e que durante este día ten unha xornada de portas abertas para dar a coñecer as súas instalacións.
  • A partir das 12:00 h, están previstos varios obradoiros  dirixidos a nen@s e rapaces/zas pero sen esquecer ás persoas maiores:

Na rúa D un obradoiro de maquillaxe e o Campo de Santa Isabel será o espazo que acolla unha divertida TIROLESA e os seguintes obradoiros:

    • DE SÍMBOLOS CELTAS realizados sobre diferentes superficies
    • DE PULSEIRAS
    • XIMKANA DE XOGOS COOPERATIVOS
    • OBRADOIRO DE XOGO TRADICIONAL (sogatira, pita cega, carreira popular de sacos, a mazá, mazurcas…)
  • Igualmente, para o público infantil, para as familias e amantes do ilusionismo está pensado o ESPECTÁCULO DE MAXIA a cargo de MANUEL LAMAS, situárase na Praza do Concello ás 18:30 h.
  • PASEOS EN KAIAK POLO RÍO MIÑO, en horario de 16:30 h a 19:30 h, esta actividade estará  guiada polo club de piragüismo CIDADE DE LUGO e para participar nela é preciso ter 7 ou máis anos e saber nadar.

Todas estas actividades están promovidas polo Concello de Outeiro de Rei e son gratuítas para o público.

ACTUACIÓNS MUSICAIS:

  • Ás 12:00 h o grupo de gaitas Nubeiro de Lugo estará na inauguración da feira e animando as rúas da mesma no tradicional pasacalle.
  • Ás 13:00 h actuará diante da Casa Consistorial a Banda Municipal de Música Sons e Soños dos concellos de Begonte, Outeiro de Rei, Friol e Rábade.
  • A partir das 17:30 h haberá animación musical polas rúas da feira  a cargo de Nubeiro e do grupo de  cantos de taberna Son de Outeiro.

BUS TURÍSTICO.

O Concello de Outeiro de Rei aproveita a feira para dar a coñecer gratuitamente a calquera persoa que o desexe unha parte dos atractivos turísticos do municipio. Con este motivo está previsto que ás 17:30 h parta das inmediacións da Casa Consistorial un autocar que contará cunha guía e que visitará os seguintes puntos:

    • CAMPO DA FEIRA (GAIOSO)
    • PENAS DE RODAS
    • SALTO DO PIAGO
    • IGREXA DE ROBRA
    • EXPOSICIÓN TRAXE ALDEAN DE GARDA NAS TERRAS DE LUGO E AO HOTEL CASAS DA FORTALEZA
    • CASA-MUSEO MANUEL MARÍA

Para participar nesta iniciativa é necesario realizar a inscrición na caseta do Concello ao longo da xornada e ata media hora antes da saída; o número de prazas está limitado a 36.

E PARA COMER…

a feira contempla a posibilidade de utilizar a fermosa carballeira do Campo de Santa Isabel para este fin. Alí haberá instalada unha carpa con capacidade para máis de 500 persoas na cal o restaurante GONZÁLEZ ofrecerá a posibilidade de mercar o menú da feira ou escoller entre diferentes opcións como polbo, empanada, churrasco, tenreira asada, doces….

Ademais, a PANADERÍA OUSÁ porá a venda empanadas, doces e varios produtos de panadería máis; haberá tamén un posto  de xeados, de algodón de azucre e garapiñadas, tortas de diferentes variedades churros…
O horario de comidas está previsto a partir das 13:30 h.

Este espazo natural é utilizado tamén por familias e grupos para celebrar nel as tradicionais merendas típicas destas datas.

AGASALLO DE CADERNOS.

Ao longo da xornada, e ata esgotar existencias, repartiranse sen custo económico na caseta do Concello uns cadernos que se poderán personalizar co nome  da persoa que se desexe na caseta ca empresa Laser Lucus terá situada na rúa D. Para obtelas será requisito responder correctamente á unha pregunta sobre Outeiro de Rei que o persoal do Concello realizará á persoa interesada.

SORTEO DE PREMIOS EN METÁLICO.

Lembrar tamén que as persoas que merquen algún produto na feira poderán participar no sorteo de  20 premios de 50 € cada un deles;  a tal efecto deberán depositar a súa rifa na urna instalada na caseta do Concello. O sorteo terá lugar ás 21:30 h. As persoas afortunadas que non estean presentes no momento do sorteo terán un prazo dun mes dende a celebración do mesmo para poder retirar no Concello de Outeiro de Rei o premio acadado. A relación de tickets premiados será difundida a través do grupo musical que actuará na praza da vila pola noite, Grupo Arizona, na web municipal e tamén será publicada no diario El Progreso o día 07/07/2023. Pódense consultar as bases: Bases sorteo premios metálico 2023

Pero non marchen de Outeiro de Rei, aínda queda máis…. Para as persoas que desexen prolongar a súa estancia en Outeiro de Rei, e se cabe aínda máis, para os veciños e veciñas do municipio que este ano non celebra as súas tradicionais Festas de Santa Isabel, para todas as persoas que o desexen,    o Concello de Outeiro de Rei promove a actuación na praza da vila do GRUPO ARIZONA a partir das 23:00 h.

Ás 24:00 h, haberá a tradicional sesión de fogos artificiais cos que despediremos a décimo quinta edición da feira, quedando moita noite para seguir gozando da música e ao día seguinte, o domingo, ás 10:30 h terá lugar a saída da Praza do Concello da VII CARREIRA SOLIDARIA DO CONCELLO DE OUTEIRO DE REI, inscricións en www.carrerasconencanto.com.

GOCEN CON NÓS DE TODAS ESTAS ACTIVIDADES PENSADAS PARA VOSTEDES E SEMPRE, SIEMPRE, BETI, FOREVER, TOUJOURS … DE OUTEIRO DE REI J.